Gjykata e Tiranës vendosi masën e sigurisë arrest në shtëpi për këngëtarin Jozefin Marku dhe shtetasin Kristian Nikolli, të cilët u ndaluan nga policia pas përfshirjes në dhunën ndaj Eduart Kuçit. Jozefin Marku, ish-banor i Big Brother VIP Albania, ishte arrestuar nga autoritetet në datën 5 shtator 2026.
Sipas hetimeve, konflikti e ka pasur zanafillën në përplasje verbale në rrjetet sociale, ku Eduart Kuçi kishte publikuar video me ofendime dhe kërcënime ndaj këngëtarit, duke përmendur hakmarrje për shkak të marrëdhënieve të mëparshme. Ngjarja fizike ndodhi pas një ballafaqimi të rastësishëm, ku personat e përfshirë detyruan Kuçin të ndalonte automjetin e tij, një McLaren, në zonën e mbikalimit të Rinasit.
Në pamjet filmike të publikuara, Jozefin Marku dëgjohet duke i kërkuar Eduart Kuçit të kërkojë falje. Përveç dy të arrestuarve, policia ka shpallur në kërkim edhe dy persona të tjerë, të cilët dyshohet se kanë marrë pjesë në këtë konflikt. Hetimet vijojnë për të zbardhur plotësisht rrethanat dhe për të dokumentuar përgjegjësitë e secilit prej personave të përfshirë në këtë ngjarje.
Përditësime
Në seancën gjyqësore për caktimin e masës së sigurisë, këngëtari Jozefin Marku pranoi konfliktin, por e justifikoi atë si veprim në gjaknxehtësi pas ofendimeve ndaj familjes së tij. Ai pretendoi se e ka goditur Eduart Kuçin vetëm me një shpullë. Nga ana tjetër, bashkëpunëtori Kristjan Nikolli mohoi kategorikisht pjesëmarrjen në ngjarje, duke alibuar se ndodhej në një dasmë. Nikolli gjithashtu u shpreh se municioni i gjetur gjatë kontrollit në banesën e tij ishte i ndryshkur dhe i papërdorshëm.
Gjatë seancës gjyqësore, këngëtari Jozefin Marku ka kërkuar zyrtarisht ndjesë për veprimet e tij. Marku deklaroi përpara trupit gjykues se nuk kishte asnjë njohje të mëparshme me Eduart Kuçin, përtej konflikteve të zhvilluara në rrjetet sociale.