Gjykata e Shkallës së Parë të Juridiksionit të Përgjithshëm Korçë, nën drejtimin e gjyqtarit Gentajan Sallahu, ka vleftësuar si të ligjshëm arrestin në flagrancë të shtetasit Violand Braçellari. Seanca për caktimin e masës së sigurisë u zhvillua në ambientet e Spitalit Universitar të Traumës në Tiranë, ku i dyshuari ndodhet i shtruar nën kujdesin mjekësor pas plagëve të marra gjatë shkëmbimit të zjarrit në Lozhan të Maliqit.
Violand Braçellari akuzohet për katër vepra të rënda penale:
• Vrasje e punonjësve të Policisë së Shtetit (në lidhje me viktimën Enea Mekolli);
• Vrasje e punonjësve të Policisë së Shtetit e mbetur në tentativë (në lidhje me të plagosurin Edison Adri);
• Mbajtje pa leje dhe prodhim i armëve, armëve shpërthyese dhe municionit në ambiente publike;
• Prodhimi dhe mbajtja pa leje e armëve të gjuetisë dhe sportive.
Sipas vendimit, Prokuroria pranë Gjykatës së Shkallës së Parë të Juridiksionit të Përgjithshëm Korçë është ngarkuar me ekzekutimin e masës së sigurisë "arrest në burg". I pandehuri dhe mbrojtja e tij kanë të drejtën e ankimit në Gjykatën e Apelit të Juridiksionit të Përgjithshëm brenda një afati prej 5 (pesë) ditësh nga momenti i njoftimit të vendimit të arsyetuar.