Prokuroria pranë Gjykatës së Shkallës së Parë të Juridiksionit të Përgjithshëm Korçë ka zyrtarizuar katër akuza ndaj shtetasit Violand Braçellari. Ngjarja ndodhi mëngjesin e 4 qershorit 2026, gjatë një operacioni të forcave të Drejtorisë Vendore të Policisë Korçë për kapjen e Braçellarit, i cili ishte person në kërkim, i dënuar më parë me 10 vjet burg për trafik narkotikësh.
Operacioni për arrestimin e tij u organizua pas kallëzimit të një 32-vjeçari, të identifikuar si A.K., i cili kishte punuar si çoban për të dyshuarin dhe kishte raportuar se ishte dhunuar e kanosur prej tij me qytën e një arme automatike. Sipas organit të akuzës, rreth orës 07:00, forcat e policisë iu afruan stallave ku qëndronte i dyshuari në Malin e Bodesë. Gjatë rrethimit, Braçellari hapi zjarr ndaj efektivëve, pavarësisht faktit se ata mbanin uniforma dhe jelekë antiplumb.
Nga shkëmbimi i zjarrit, humbi jetën punonjësi i policisë Enea Mekolli, ndërsa mbeti i plagosur kolegu i tij, Edison Adri. I dyshuari tentoi të largohej nga vendngjarja, por u plagos gjatë përplasjes me efektivët dhe u kap pak metra larg stallave.
Akuzat zyrtare të ngritura ndaj tij përfshijnë:
• “Vrasja e punonjësve të Policisë së Shtetit”;
• “Vrasja e punonjësve të Policisë së Shtetit”, e mbetur në tentativë;
• “Mbajtja pa leje dhe prodhimi i armëve, armëve shpërthyese dhe i municionit”;
• “Prodhimi dhe mbajtja pa leje e armëve të gjuetisë dhe sportive”.
Në lidhje me këtë ngjarje, Prokuroria është duke hetuar edhe rrethanat e organizimit të operacionit policor, për të verifikuar nëse ka pasur elementë të veprës penale “Shpërdorim detyre”.
Përditësime
Gjykata caktoi masën e sigurisë ndaj Violand Braçellarit më 7 qershor 2026. Seanca u zhvillua në Spitalin Universitar të Traumës në Tiranë, ku i dyshuari vijon trajtimin mjekësor pas plagosjes.