Një operacion policor për arrestimin e një personi në kërkim ka përfunduar tragjikisht në fshatin Podenë të bashkisë Maliq. Si pasojë e një shkëmbimi zjarri, ka humbur jetën efektivi i forcave "Shqiponja" të Drejtorisë Vendore të Policisë Korçë, Enea Mekolli, ndërsa kolegu i tij, Edison Adri, ka mbetur i plagosur dhe po merr ndihmë mjekësore të specializuar.
Autori i dyshuar është identifikuar si Violand Braçellari, një ish-ushtarak i shpallur në kërkim prej vitesh nga Policia e Vlorës për vepra penale në fushën e lëndëve narkotike. Sipas autoriteteve, Braçellari jetonte i izoluar prej vitesh në një zonë pyjore, ku kishte ngritur një stan të madh dhe strehohej në terren të vështirë.
Operacioni, në të cilin morën pjesë rreth 7-8 efektivë, dyshohet se u zhvillua gjatë orëve të para të së enjtes, rreth orës 03:00-04:00. I dyshuari, i njohur për aftësitë e tij në përdorimin e armëve dhe rrezikshmërinë e lartë, dyshohet se i ka pikasur forcat e policisë dhe ka hapur zjarr në drejtim të tyre.
Pas shkëmbimit të zjarrit, forcat e policisë kanë arritur ta neutralizojnë të dyshuarin, i cili raportohet i plagosur. Në zonë kanë mbërritur forca të shumta policie dhe drejtues të lartë për të vijuar hetimet rreth dinamikës së ngjarjes dhe rrethanave të ndërhyrjes.
Përditësime
Policia e Shtetit njoftoi se ngjarja e rëndë në zonën e Lozhanit, në malin e Bodenit, ka ndodhur në orën 07:30. Gjatë operacionit për arrestimin e autorit, i cili mbeti i plagosur dhe u vu në pranga në vendngjarje, humbi jetën një efektiv policie. Hetimet konfirmuan se autori ka qenë i dënuar më parë në vitin 2017 dhe ka pasur një masë sigurie në vitin 2011. Të plagosurit u transportuan me helikopter nga zona e operacionit drejt qendrave spitalore.