Një ngjarje e rëndë ka ndodhur mëngjesin e datës 4 qershor në Malin Bode, pranë Lozhanit në Bashkinë Maliq. Gjatë një operacioni për kapjen e personit të shpallur në kërkim, Violand Braçellari, i cili rezulton me precedentë penalë për prodhim dhe shitje të lëndëve narkotike, humbi jetën në krye të detyrës inspektori Enea Mekolli, ndërsa mbeti i plagosur kolegu i tij, Edison Adri.
Sipas Drejtorit të Përgjithshëm të Policisë së Shtetit, Skënder Hita, forcat e policisë mbërritën në vendstrehimin e të kërkuarit rreth orës 07:30. Pavarësisht thirrjeve për dorëzim, autori hapi zjarr me armë automatike, e cila, sipas njoftimit zyrtar, depërtoi jelekët antiplumb të efektivëve. Në operacion ishin të angazhuara 40 forca policie.
Drejtori Hita deklaroi se nuk ka qenë në dijeni të planit operacional në momentin e zhvillimit të tij, duke shtuar se operacioni ishte organizuar nga Drejtoria Vendore e Policisë Korçë. Për këtë arsye, ai ka urdhëruar Drejtorinë e Standardeve Profesionale të nisë një hetim mbi procedurat e ndjekura, përfshirë shkaqet pse nuk ishte kërkuar mbështetje nga forcat speciale RENEA ose forcat e sigurisë.
Ministri i Brendshëm, Besfort Lamallari, shprehu ngushëllimet për familjen e viktimës dhe vizitoi efektivin e plagosur në spital për t’u siguruar për trajtimin e tij mjekësor. Ndërkohë, po punohet për dokumentimin e plotë ligjor të ngjarjes, ndërsa kanë nisur procedurat për shpalljen e inspektorit Enea Mekolli si "Dëshmor i Atdheut".
Përditësime
Hetimet zbardhën të shkuarën kriminale të autorit, Violand Braçellari, i dënuar në vitin 2017 me 9 vjet, 11 muaj e 7 ditë burgim për trafik narkotikësh. Pas ngjarjes, drejtori i Agjencisë së Mbikëqyrjes Policore (AMP), Klevis Qose, u zhvendos në Korçë për të drejtuar hetimet. Në operacion u angazhuan 40 efektivë, përfshirë 6 nga forcat e posaçme 'Shqiponja'. Efektivi i plagosur, Edison Adri, është transportuar për ndihmë mjekësorë të specializuar në Spitalin e Traumës në Tiranë.
Familjarë, kolegë dhe krerë të shtetit, përfshirë Presidentin Bajram Begaj dhe ministren Albana Koçiu, i dhanë sot lamtumirën e fundit efektivit Enea Mekolli në Pogradec. Gjatë kontrolleve në banesën e autorit, forcat e rendit sekuestruan një kallashnikov, një pushkë model 56, një çifte dhe një radio policie. Lidhur me dinamikën e operacionit, Policia e Korçës sqaroi se vlerësimi i rrezikshmërisë u bazua në mungesën e precedentëve penalë të autorit për krime kundër jetës, ndërsa theksoi se përfshirja e forcave RENEA nuk është procedurë e detyrueshme për çdo ndërhyrje.