Hetimet për ngjarjen e rëndë të ndodhur në fshatin Lozhan të Maliqit vijojnë pas shkëmbimit të zjarrit ku mbeti i vrarë efektivi i policisë, Enea Mekolli, dhe u plagos kolegu i tij, Edison Adri. Në vendstrehimin e autorit, Violand Braçellari, janë sekuestruar tri armë zjarri: një automatik kallashnikov, një pushkë model 56 dhe një armë gjahu tip çifte.
Grupi hetimor bën me dije se në vendngjarje nuk është gjetur municion, çka ngre dyshimet se Braçellari ka shpenzuar të gjithë arsenalin që posedonte gjatë përplasjes. Po ashtu, është gjetur një radio policie, ndërsa burime nga operacioni sqarojnë se efektivët kishin fikur radiot e tyre gjatë aksionit për të shmangur interferencat me komunikimet e të dyshuarit.
Konkluzionet e AMP dhe Prokurorisë
Agjencia e Mbikëqyrjes Policore (AMP) dhe Prokuroria nuk kanë konstatuar shkelje të protokolleve operative nga ana e Drejtorisë Vendore të Policisë Korçë. Sa i përket debatit mbi mospërfshirjen e forcave RENEA ose të Forcës Operacionale, grupi hetimor sqaroi se vlerësimi i riskut ishte bërë bazuar në profilin penal të të dyshuarit. Violand Braçellari ishte i dënuar për prodhim dhe shitje të lëndëve narkotike dhe jo për krime të rënda kundër jetës.
Sipas hetimeve, kërkesa për angazhimin e forcave speciale vlerësohet rast pas rasti bazuar në analizën e rrezikshmërisë dhe nuk përbën një detyrim ligjor të përhershëm për çdo operacion policor.