Ngjarja e rëndë ndodhi ditën e sotme në fshatin Lozhan të Korçës, gjatë përpjekjes së forcave të rendit për të ndaluar 43-vjeçarin Violand Braçellari. Sipas informacioneve paraprake, autori ishte parë një ditë më parë në fshatin Boden, ndërsa policia organizoi operacionin pasi mori njoftim se ai ishte zhvendosur drejt një stani ku mbante bagëti dhe qëndronte me të ëmën.
Në operacion u angazhuan 6 efektivë të forcave Shqiponja. Burime raportojnë se strukturat policore të Korçës nuk e kanë vlerësuar siç duhet shkallën e rrezikshmërisë së autorit, duke pasur parasysh faktin se ai u kishte shpëtuar ndërhyrjeve të forcave speciale RENEA në 4 raste të mëparshme.
Violand Braçellari rezulton të jetë person me precedentë penalë, ku mësohet se para një viti dyshohet të ketë dhunuar një shtetas, duke e tërhequr zvarrë me kalë për më tepër se dy orë. Ndërkohë, po vijojnë hetimet lidhur me rrethanat e këtij operacioni që përfundoi me humbjen e jetës së një efektivi dhe plagosjen e një tjetri.
Përditësime
Policia e Shtetit konfirmoi se efektivi Enea Mekolli humbi jetën gjatë një operacioni për kapjen e një të dyshuari në bashkinë e Maliqit.