Gjykata e Apelit e Kosovës, përmes aktvendimit APS.nr.19/2026, ka vendosur anulimin e aktgjykimit të Gjykatës Themelore në Prishtinë – Departamenti Special, në lidhje me çështjen penale kundër të akuzuarit Srdjan Lazoviq. Me këtë vendim, çështja kthehet në rigjykim dhe rivendosje në shkallën e parë.
Srdjan Lazoviq fillimisht ishte shpallur fajtor nga Gjykata Themelore në Prishtinë për veprën penale "Krime lufte kundër popullsisë civile në bashkëkryerje", sipas Ligjit Penal të Republikës Socialiste Federative të Jugosllavisë, duke u dënuar me 12 vjet e 6 muaj burgim. Ankesa e mbrojtëses së të akuzuarit, avokates Feride Xani, si dhe ankesa e vetë të akuzuarit, u aprovuan nga organi i shkallës së dytë.
Në arsyetimin e saj, Gjykata e Apelit ka konstatuar se aktgjykimi i shkallës së parë përmban shkelje thelbësore të procedurës penale, të cilat kanë çuar në vërtetim të gabuar dhe jo të plotë të gjendjes faktike. Gjykata vërejti se megjithëse ishin administruar prova të konsiderueshme materiale, ato nuk u vlerësuan në arsyetimin e vendimit.
Në mënyrë të veçantë, u theksua se nuk u trajtuan provat kyçe, duke përfshirë:
• Raportin e Agjencisë së Kosovës për Forenzikë.
• Dy raporte të ekspertëve ndërkombëtarë, të cilat lidhen drejtpërdrejt me identifikimin e të akuzuarit.
Sipas Apelit, gjykata nuk ka dhënë sqarime mbi arsyet se përse këto prova nuk janë analizuar ose mbi çfarë baze janë pranuar apo refuzuar. Rasti tani i rikthehet shkallës së parë për një proces të ri gjyqësor.
Përditësime
Më 19 nëntor 2024, Prokuroria Speciale e Republikës së Kosovës ngriti aktakuzë kundër Srdjan Lazoviqit për krime lufte të kryera në fshatin Panorc të Malishevës. Sipas aktakuzës, në cilësinë e pjesëtarit të xhandarmërisë serbe, Lazoviqi akuzohet për keqtrajtimin e rreth 500 civilëve, me qëllim spastrimin etnik të popullsisë shqiptare në këtë zonë.