Producenti Petri Bozo është lënë në masën e sigurisë “arrest në shtëpi” nga Gjykata e Apelit Tiranë, e cila rrëzoi vendimin e mëparshëm të Gjykatës së Elbasanit për mbajtjen e tij në burg. Me këtë vendim, gjykata ka urdhëruar lirimin e menjëhershëm të tij nga paraburgimi, ku ai kishte qëndruar për disa javë pas kërkesës së prokurorisë.
Ngjarja për të cilën akuzohet 61-vjeçari ndodhi në muajin Maj, në fshatin Mengël të Elbasanit. Në këtë aksident rrugor humbi jetën 7-vjeçari Algit Samurri, i cili po shkonte në shkollë i shoqëruar nga nëna. Sipas raportimeve, fëmija kishte shpëtuar nga vëmendja e prindit për një moment dhe kishte dalë në rrugë, ku u godit nga automjeti që drejtohej nga Petri Bozo.
Kërkesa për zëvendësimin e masës së sigurisë ishte paraqitur më herët nga mbrojtja e producentit, por ishte refuzuar fillimisht nga shkalla e parë. Pas ankimit në Apelin e Tiranës, trupa gjykuese vlerësoi se ndaj të pandehurit mund të aplikohej një masë më e lehtë. Autoritetet gjyqësore theksuan se ky vendim nuk përbën një përfundim mbi fajësinë apo pafajësinë e të pandehurit, pasi procedimi penal ndaj tij është ende në shqyrtim.
Përditësime
Grupi hetimor ka konstatuar se automjeti që drejtohej nga Petri Bozo ka qenë duke lëvizur tej normave të lejuara të shpejtësisë në momentin e përplasjes fatale. Ngjarja ka ndodhur përballë shkollës 9-vjeçare Sulejman Rranci në aksin Elbasan-Librazhd, ndërsa viktima ishte nxënës i turnit të pasdites. Në dëshminë e tij, Bozo ka pretenduar se po lëvizte me shpejtësi të ulët dhe nuk e ka vënë re fëmijën, duke shtuar se kishte përshëndetur një efektiv policie pak para incidentit.
Hetimet zbardhën detaje të reja mbi rrethanat e ngjarjes tragjike. Burimet hetimore konfirmuan se 7-vjeçari Algit Samurri ndodhej në shoqërinë e nënës së tij për të dërguar motrën në shkollë në momentin e aksidentit. Ndërkohë, producenti Petri Bozo ishte mbajtur në paraburgim që prej datës 25 maj, përpara se Gjykata e Apelit të ndryshonte masën e sigurisë në “arrest në shtëpi”.