Gjykata e Apelit të Juridiksionit të Përgjithshëm ka rrëzuar ankimin e regjisorit Petri Bozo, duke lënë në fuqi vendimin e Gjykatës së Shkallës së Parë Elbasan për mbajtjen e tij në qeli. Regjisori kishte kërkuar zëvendësimin e masës së sigurisë me një më të butë, kërkesë e cila u refuzua nga trupi gjykues.
Ngjarja për të cilën ai akuzohet ndodhi në mëngjesin e datës 25 maj, në afërsi të shkollës së fshatit Mengël. Sipas të dhënave të organit të hetimit, Petri Bozo po drejtonte automjetin kur përplasi për vdekje një 7-vjeçar, nxënës i klasës së parë.
I mituri ndodhej pranë rrugës bashkë me nënën e tij në momentin e përplasjes, pasi kishin shoqëruar më herët motrën e vogël në institucionin arsimor.
Përditësime
Hetimet për aksidentin fatal ku u përfshi regjisori Petri Bozo pranë shkollës 9-vjeçare 'Sulejman Rranci' kanë zbardhur dinamikën e ngjarjes. Sipas burimeve, viktima, nxënës i turnit të pasdites, i është shkëputur nga dora nënës për të kaluar rrugën drejt një dyqani, moment kur është përplasur nga automjeti.
Në seancën e fundit gjyqësore, avokatët e regjisorit Petri Bozo kërkuan shpalljen të paligjshëm të arrestimit të tij. Bozo mohoi akuzat për tejkalim të shpejtësisë në aksin Elbasan-Librazhd, duke pretenduar se automjeti nuk ishte në lëvizje në momentin e aksidentit fatal pranë shkollës 'Sulejman Rranci'.