Një aksident me pasojë vdekjen e një të mituri është regjistruar rreth orës 08:00 të mëngjesit në fshatin Mëngël të Elbasanit. Fëmija, nxënës në shkollën 9-vjeçare “Sulejman Rranci”, po shoqërohej nga e ëma kur dyshohet se i është shkëputur nga dora dhe ka hyrë në rrugën nacionale, ku është goditur nga automjeti që drejtohej nga Petri Bozo, 61 vjeç.
Sipas dëshmive të banorëve të zonës, aksi rrugor në fjalë konsiderohet i rrezikshëm për shkak të shpejtësisë me të cilën lëvizin mjetet dhe afërsisë së shkollës me rrugën kryesore. Banorët theksuan se ky nuk është aksidenti i parë i kësaj natyre në këtë segment.
Grupi hetimor i Policisë së Elbasanit ka mbërritur në vendngjarje për të kryer veprimet procedurale dhe për të zbardhur dinamikën e plotë të aksidentit. Drejtuesi i automjetit, Petri Bozo, është shoqëruar në komisariat, ndërsa po punohet për përcaktimin e shkaqeve dhe përgjegjësive ligjore lidhur me ngjarjen.