Një aksident rrugor me pasojë vdekjen e një të riu ka ndodhur këtë të enjte në aksin kombëtar Elbasan–Librazhd, në fshatin Mengël. Viktima është shtetasi Klement Balla, 19 vjeç, banues në fshatin Griqan të Bashkisë Elbasan.
Sipas informacioneve paraprake, automjeti që drejtohej nga i riu ka dalë nga rruga dhe është përplasur me barrierat mbrojtëse anësore. Dyshohet se shkaku i aksidentit ka qenë humbja e kontrollit të mjetit, e favorizuar nga shpejtësia e lartë.
Njoftimi zyrtar i Policisë konfirmon se shtetasi K. B. ka humbur jetën si pasojë e aksidentit. Grupi hetimor, nën drejtimin e Prokurorisë, po kryen veprimet procedurale për të zbardhur rrethanat dhe shkaqet e plota që çuan në këtë ngjarje.
Përditësime
Hetimet e Policisë së Shtetit për aksidentin fatal në aksin Elbasan-Librazhd zbardhën detaje të reja. Ngjarja ka ndodhur në orën 17:50 në Labinot-Fushë, ku automjeti i përfshirë pësoi dëme të rënda në pjesën ballore dhe anësore.