Gjykata Administrative e Këlnit vendosi në një vendim të përkohshëm që Zyra Federale për Mbrojtjen e Kushtetutës (BfV) nuk lejohet ta klasifikojë dhe trajtojë partinë Alternativa për Gjermaninë (AfD) si ekstremiste të djathtë të sigurtë, për sa kohë vazhdon procedura gjyqësore derisa të shpallet vendimi përfundimtar.
Vendimi erdhi pas kërkesës urgjente të AfD-së, e cila u pranua në thelb. Ai mund të ankohet në Gjykatën e Lartë Administrative për landin Nordrhein-Westfalen në Münster.
Sipas vlerësimit të gjykatës, me një siguri të mjaftueshme mendohet se brenda AfD-së zhvillohen përpjekje të drejtuara kundër rendit demokratik dhe liberal. Megjithatë, kjo nuk e karakterizon partinë në një mënyrë të tillë që, në tërësinë e saj, të mund të konstatohet një prirje themelore armiqësore ndaj Kushtetutës.
Klasifikimi i mëparshëm nga BfV
Pas një shqyrtimi disavjeçar, BfV e klasifikoi AfD-në vitin e kaluar si të sigurtë ekstremiste të djathtë. Dyshimi se partia ndjek synime kundër rendit demokratik dhe liberal u konfirmua dhe u konsolidua në bindje të plotë, njoftoi atëherë BfV.
AfD-ja ndërmori hapa ligjorë kundër këtij klasifikimi duke paraqitur padi dhe kërkesë urgjente në Gjykatën Administrative të Këlnit, ku ndodhet selia e BfV-së. Me padinë synonte ndalimin e klasifikimit, renditjes dhe trajtimit si ekstremiste të djathtë.
Pas këtij vendimi, BfV nuk ka të drejtë ta quajë publikisht AfD-në parti të sigurtë ekstremiste të djathtë deri në vendim gjyqësor përfundimtar.