Gjykata e Korçës ka caktuar masën e sigurisë arrest në shtëpi për kirurgun Nikolla Nunka, i akuzuar për ngacmim seksual ndaj një paciente 21-vjeçare. Vendimi u mor më 14 maj në një seancë me dyer të mbyllura, që zgjati rreth 2 orë.
Denoncimi u bë më 11 maj nga e reja, e cila u paraqit në urgjencën e Spitalit të Korçës për dhimbje barku dhe të vjella. Pas kontrolleve, u vendos ndërhyrje kirurgjikale për apandisit. Sipas kallëzimit, gjatë procedurës mjeku dyshohet se e ngacmoi seksualisht pacienten, duke e prekur në pjesë intime nën pretendimin e kontrollit mjekësor. Nikolla Nunka u arrestua në flagrancë tre ditë më parë.
Prokuroria paraqiti prova që implikojnë kirurgun dhe provojnë dyshimin e arsyeshëm për veprën penale. Prokurori kërkoi arrest në shtëpi për shkak të moshës së 72-vjeçarit dhe vlerësimin si të ligjshëm të arrestit në flagrancë; kërkesat u pranuan nga gjykata. Mjeku mbajti qëndrim mohues gjatë seancës dhe marrjes në pyetje.
Sipas burimeve, babai i 21-vjeçares e akuzoi mjekun edhe për mitmarrje, duke thënë se Nunka i kishte kërkuar 1000 euro për operacionin. Gjykata nuk e mori parasysh këtë akuzë për masën e sigurisë, por hetimet vazhdojnë nga prokuroria.
Më 13 maj, kirurgu u dërgua nga paraburgimi në Spitalin e Korçës për probleme kardiake. Avokatja e pacientës tha se ky nuk është denoncimi i parë ndaj mjekut, duke përmendur një rast para 33 vitesh. Nikolla Nunka rezulton i dënuar në vitin 2014 nga Gjykata e Korçës me 2 vjet e 6 muaj burg për korrupsion pasiv dhe iu hoq e drejta e ushtrimit të profesionit për 6 muaj. Hetimet vazhdojnë për zbardhjen e rrethanave.