Gjykata e Lartë nuk ka pranuar rekursin e ish-zëvendëskryeministres Belinda Balluku kundër masës "ndalim i daljes jashtë shtetit". Vendimi u mor më 9 prill 2026 nga gjyqtari Ilir Panda, i cili la në fuqi bllokimin e pasaportës së saj.
Pasaporta e Ballukut u sekuestrua që nga 19 nëntori me vendim të Gjykatës së Posaçme kundër Korrupsionit dhe Krimit të Organizuar (GJKKO), në kuadër të hetimeve të SPAK-ut.
Ndaj Ballukut rëndon akuza për shkelje të barazisë në tenderë, e komunikuar zyrtarisht. Ajo është nën hetim për 7 lotet e Ujësjellësit të Unazës së Madhe dhe dyshohet për përfshirje në 3 tenderë të tjerë.
Hetimet ndaj Ballukut filluan në tetor të vitit të kaluar. SPAK dështoi të sigurojë arrestimin e saj, pasi kërkesa për heqjen e imunitetit u hodh poshtë nga mazhoranca socialiste.
Me këtë vendim, masa e ndalimit të daljes jashtë shtetit mbetet në fuqi, ndërsa hetimet vazhdojnë.