Gjykata e Lartë do të shqyrtojë më 9 prill rekursin e ish-zëvendëskryeministres Belinda Ballukut kundër masës së "ndalimit të daljes jashtë shtetit". Kjo masë u vendos nga GJKKO më 19 nëntor, bashkë me njoftimin e akuzës për shkelje të barazisë në tenderë.
Gjyqtari Ilir Panda do të vendosë nëse Ballukut do t’i rikthehet pasaporta. Ajo ndodhet nën hetim gjithashtu për 7 lotet e Unazës së Madhe dhe dyshohet për tre tenderë të tjerë. Balluku ka ankimuar edhe masën e pezullimit nga detyra, ndonëse tani është shkarkuar si zëvendëskryeministre dhe ministre e Infrastrukturës.
Në të njëjtën seancë, Gjykata e Lartë do të shqyrtojë ankimin e ish-kreut të KESH-ut, Erald Elezit, i cili ndodhet në masën e arrestit shtëpiak. Ai akuzohet për shkelje të barazisë në tenderë për Tunelin e Llogarasë dhe Unazën e Madhe.
Ish-kreu i ARRSH-së, i cili ndodhet po ashtu në arrest shtëpiak dhe akuzohet vetëm për shkelje në tenderin e Llogarasë, nuk ka paraqitur ankim për masën e sigurisë.