Gjykata e Lartë ka ndërmarrë një ndryshim procedural në shqyrtimin e dosjes së ish-ministrit të Brendshëm Saimir Tahiri dhe ish-drejtorit të Policisë së Vlorës Jaeld Çela, duke zëvendësuar gjyqtarin relator.
Në vitin 2022, shorti kishte caktuar Sokol Binaj si relator të çështjes. Megjithatë, në dhjetor të vitit 2025, Binaj paraqiti dorëheqjen për të shmangur konflikt interesi, pasi kishte shqyrtuar më parë kërkesa gjyqësore të Tahirit në ish-Apelin për Krime të Rënda. Si relator i ri u emërua Genti Shala, i sapoemëruar në Gjykatën e Lartë.
Procesi në Gjykatën e Lartë u nis pas rekursit të Prokurorisë së Posaçme kundër Korrupsionit dhe Krimit të Organizuar (SPAK), e cila kundërshton vendimet e gjykatave më të ulëta. SPAK nuk pajtohet me dënimin e Tahirit vetëm për shpërdorim detyre dhe kërkon shpalljen e tij fajtor edhe për trafik narkotikësh dhe pjesëmarrje në grup të strukturuar kriminal. Për këto akuza, prokuroria kërkon një dënim prej 12 vitesh burg.
Ish-Gjykata e Shkallës së Parë për Krime të Rënda e shpalli fajtor Tahirin për shpërdorim detyre, duke e dënuar me 5 vite burg. Për shkak të gjykimit të shkurtuar, dënimi u reduktua në 3.4 vite. Më pas, u vendos pezullimi i ekzekutimit dhe vënia në shërbim prove. Ky vendim u ankimua nga të dyja palët. Apeli i Gjykatës së Posaçme të Apelit për Krime të Rënda (GJKKO) e rrëzoi pezullimin, duke lënë në fuqi dënimin me 3.4 vite burg. Pas vuajtjes së një pjese të dënimit, Tahiri u lirua nga Gjykata e Elbasanit për shkak të rrethanave familjare.
Në Gjykatën e Lartë, përveç relatorit Genti Shala, pritet të caktohet data e seancës dhe dy anëtarë të tjerë të trupës gjyqësore. Trupa do të shqyrtojë rekursin e SPAK-ut dhe ankimin e Tahirit, i cili kërkon shpalljen e pafajësisë.