Kolegji Penal i Gjykatës së Lartë ka zgjidhur mosmarrëveshjen e kompetencës midis Gjykatës së Posaçme kundër Korrupsionit dhe Krimit të Organizuar (GJKKO) dhe Gjykatës së Shkallës së Parë të Juridiksionit të Përgjithshëm Tiranë. Sipas vendimit, kjo dosje penale, e lidhur me kontrollin e policisë në muajin maj të vitit 2022 në hotelin “Zeus Garden”, do të shqyrtohet nga gjykata e juridiksionit të përgjithshëm.
Procedimi penal ndaj Ervis Martinajt, i cili mbetet i zhdukur që nga gushti i vitit 2022, përfshin akuzat për “Mbajtje pa leje dhe prodhim të armëve, armëve shpërthyese dhe municionit” dhe “Mbajtje pa të drejtë e uniformës”. Në të njëjtën çështje, Armand Merlika, Ergys Merlika dhe Dea Pistolja akuzohen për “Moskallëzim krimi”. Gjatë kontrollit në hotel u sekuestruan një pistoletë, municione, jelekë me mbishkrimin “Policia”, portofolë me stema policore, maska, doreza antiplumb dhe pranga. Provë kyçe mbetet ekspertiza e ADN-së, e cila përputhet me profilin gjenetik të Martinajt.
Konflikti i kompetencave kishte lindur pasi Gjykata e Tiranës vlerësonte se dosja duhej shqyrtuar nga GJKKO për shkak të lidhjes me hetime të tjera të SPAK-ut ndaj Martinajt për grup të strukturuar kriminal. Nga ana tjetër, GJKKO e kishte refuzuar çështjen me argumentin se në këtë procedim nuk figuron akuza formale për grup të strukturuar kriminal. Gjykata e Lartë mbështeti qëndrimin se në këtë fazë procesuale, gjykata nuk mund të shtojë akuza që nuk janë ngritur nga prokuroria, duke theksuar se kompetenca përcaktohet nga akuzat zyrtare të formuluara në dosje.
Përditësime
Hetuesit kanë izoluar një profil ADN-je nga një furçë dhëmbësh e sekuestruar në një dhomë hoteli, provë kjo që mund të hedhë dritë mbi fatin e Ervis Martinajt. Gazetarja Anila Hoxha raporton se gjurmët biologjike po i nënshtrohen analizave krahasuese për konfirmim.