Gjykata e Lezhës dënoi më 25 mars shtetasin portugez Ruben Saraiva me burgim të përjetshëm, si ekzekutor i vrasjes së biznesmenit Ardian Nikulaj. Ngjarja ndodhi më 19 prill 2023 në ambientet e lokalit të viktimës në Shëngjin.
Vendimi u shpall në një seancë të zhvilluar nën masa të rrepta sigurie, me praninë e familjarëve të viktimës. Saraiva u shpall fajtor për veprën penale të "Vrasjes së kryer për interes ose hakmarrje", si dhe për "Mbajtjen pa leje dhe prodhimin e armëve, armëve shpërthyese dhe municionit".
Avokati mbrojtës Kujtim Cakrani reagoi duke e cilësuar vendimin të padrejtë dhe klientin e tij të pafajshëm. Ai deklaroi: "Gjykata e Lezhës ka dënuar një të pafajshëm, sepse nuk ekziston asnjë provë që implikon Ruben Saraivën në këtë vrasje. Çështja është trajtuar si një gjyq popullor dhe jo mbi prova".
Cakrani përmendi shkeljet proceduriale të shumta në hetim dhe gjykim, duke theksuar mospranimin e provave dhe kërkesave të mbrojtjes në seancat paraprake dhe gjatë gjykimit. Ai u shpreh optimist se Gjykata e Apelit do të japë një vendim tjetër, bazuar në prova dhe argumente. Avokati konfirmoi se do ta apelojnë vendimin, duke ushtruar të drejtën kushtetuese dhe ligjore.
Sipas hetimeve, vrasja ishte planifikuar me kujdes dhe e organizuar në detaje.
Përditësime
Avokati Cakrani deklaroi se klienti i tij, Ruben Saraiva, i ka kërkuar të apelojë dënimin me burg përjetë të Gjykatës së Lezhës për vrasjen e Ardian Nikulajt.