Ruben Saraiva, shtetas portugez, paraqitet sot në Gjykatën e Lezhës në vijim të procesit gjyqësor për vrasjen e biznesmenit Ardian Nikulaj, ngjarje e ndodhur në Shëngjin në prill të vitit 2023.
Në seancën e sotme, mbrojtja paraqiti konkluzionet përfundimtare. Prokuroria e Lezhës ka dhënë më herët pretencën, duke kërkuar dënim me burgim të përjetshëm për të pandehurin.
Avokati i Saraivës, Kujtim Cakrani, deklaroi se nuk ekzistojnë prova të mjaftueshme që e implikojnë klientin e tij në vrasje. Ai pretendoi se Saraiva është i pafajshëm dhe mbahet padrejtësisht në burg. Sipas avokatit, i pandehuri ka deklaruar se është diskriminuar nga Drejtoria e Burgjeve gjatë gjithë periudhës së hetimit dhe gjyqit, ndërsa policia dhe prokuroria dinë autorët e vërtetë të ngjarjes.
Seanca përfundoi pas paraqitjes së konkluzioneve nga pala mbrojtëse. Gjykata ka caktuar seancën e radhës për datën 25 mars, kur pritet shpallja e vendimit.
Përditësime
Sipas avokatit të tij, Ruben Saraiva konfirmoi personalisht diskriminimin nga Drejtoria e Burgjeve gjatë seancës së sotme në Gjykatën e Lezhës.
Ruben Saraiva foli për rreth 20 minuta në Gjykatën e Lezhës, duke mohuar lidhjen me vrasjen e biznesmenit Ardian Nikulaj. "E dini shumë mirë kush janë vrasësit e tij në Shëngjin dhe unë nuk kam asnjë lidhje me këtë ngjarje," deklaroi ai. Seanca zgjati 3 orë. Ai ankohet për diskriminim gjatë 2 viteve të paraburgimit me izolim total. Prokuroria paraqiti pretendat më 3 mars për vrasje të kryer për interes ose hakmarrje, mbajtje pa leje dhe prodhim armësh. Ngjarja ndodhi më 19 prill 2023 brenda hotelit "Coral" në Shëngjin, ku Saraiva u afrua me skafandër në kokë. Dyshohet se vrasja u porosit.