Gjykata e Posaçme ka vendosur të ndryshojë masat e sigurisë për katër të pandehur në dosjen “Bankers”. Masa e arrestit në shtëpi u zëvendësua me ndalim të daljes jashtë vendit dhe detyrim për t’u paraqitur periodikisht te autoritetet.
Të prekur nga ky vendim janë Leonidha Çobo, Hong Ping Xiao, Ardit Kero dhe Lianyi Wang. Kërkesa për ndryshimin e masave erdhi nga prokurorët e posaçëm Enkelejda Millonai dhe Anita Jella, të cilat argumentuan se kishte kaluar afati 9-mujor i paraburgimit.
Avokatët e të pandehurve kishin kërkuar shuarjen e plotë të masave të sigurisë. Në të njëjtën dosje, disa të pandehur të tjerë hetohen në gjendje të lirë, pa masa sigurie.
Të katër të pandehurit akuzohen për vepra penale si “Krijim skemash mashtruese lidhur me TVSH-në”, “Fshehje të të ardhurave”, “Pastrim të produkteve të veprës penale”, “Shpërdorim detyre” dhe “Moskryerje të detyrave nga organet tatimore”.