Gjykata Kushtetuese e Republikës së Shqipërisë dha vendimin nr. 44, të datës 29 korrik 2025, duke pranuar pjesërisht ankimin kushtetues të Onejda Ymerajt. Ky vendim lidhet me sekuestrimin e telefonit celular të saj nga oficerët e policisë gjyqësore, në kuadër të një hetimi penal të drejtuar nga Prokuroria e Posaçme kundër Korrupsionit dhe Krimit të Organizuar (SPAK) për veprat e korrupsionit dhe pastrimit të parave.
Çështja filloi me sekuestrimin e celularit, ku SPAK pretendoi se veprimi ishte urgjent për të shmangur rrezikun e humbjes ose fshirjes së të dhënave elektronike, duke e konsideruar telefonin si mjet prove. Onejda Ymeraj, e cila nuk ishte person nën hetim, argumentoi se sekuestrimi u krye pa vendim gjykate dhe se ekspertimi teknik dha akses masiv në të dhëna personale dhe komunikime private, përfshirë informacione sensitive pa lidhje me hetimin.
Gjykata Kushtetuese konstatoi cenimin e fshehtësisë së korrespondencës dhe të drejtës për mbrojtjen e të dhënave personale për pjesën e të dhënave që nuk lidhen me objektin e hetimit. Ajo theksoi se telefoni celular, në realitetin teknologjik aktual, nuk është thjesht një objekt fizik, por një "arkiv" i jetës personale dhe profesionale, që përmban korrespondencë, të dhëna personale dhe informacione të palëve të treta. Për rrjedhojë, sekuestrimi përbën ndërhyrje serioze në privatësi.
Vendimi njeh legjitimitetin e interesit publik për hetimin e veprave të rënda penale, por kërkon që ndërhyrja të jetë e ligjshme dhe e domosdoshme. Të dhënat nga celularët mund të përdoren vetëm nëse përcaktohen paraprakisht me vendim gjykate si relevante për çështjen në hetim, duke vënë kufij SPAK-ut dhe Gjykatës së Posaçme Kundër Korrupsionit dhe Krimit të Organizuar (GJKKO).
Avokati Gentian Romano, i ftuar në emisionin "Real Story", vlerësoi vendimin si të drejtë dhe të rëndësishëm proceduralisht. Ai theksoi se kufizon praktikën e deritanishme të prokurorisë për sekuestrimin "forcërisht" të telefonave dhe nxjerrjen e komunikimeve pa procedura strikte, siç parashikon Kodi i Procedurës Penale.