Gjykata Kushtetuese ka pranuar pjesërisht ankimin e Igor Kokunov, shtetas rus 62-vjeçar, kundër vendimeve gjyqësore që lejuan ekstradimin e tij në Federatën Ruse, dhe ka vendosur ta kalojë për shqyrtim në seancë publike.
Kokunov u arrestua në gusht 2023 në pikëkalimin kufitar të Muriqanit në Shkodër, pasi kërkohej ndërkombëtarisht nga autoritetet ruse si i dyshuar për vepra të rënda penale, lidhje mafioze dhe vrasje. Gjykata e Shkodrës, Gjykata e Apelit dhe Gjykata e Lartë miratuan ekstradimin. Megjithatë, sipas disa burimeve, ekstradimi u krye më 30 tetor, ndërsa sipas të tjerave më 30 dhjetor 2024, në të njëjtën ditë kur Gjykata Kushtetuese vendosi pezullimin e procedurës në orën 17:15.
Në ankim, i përfaqësuar nga avokati Isuf Shehu, Kokunov kërkon konstatimin si antikushtetues të vendimeve të tre shkallëve të gjyqësorit dhe veprimeve të Ministrisë së Drejtësisë, Prokurorisë së Përgjithshme, Policisë së Shtetit dhe Drejtorisë së Përgjithshme të Burgjeve pas pezullimit.
Gjykata Kushtetuese konstatoi cenim të të drejtës së tij për të mos u nënshtruar trajtimit çnjerëzor ose degradues, si dhe të së drejtës për mosdëbim. Arsyetimi i plotë i vendimit pritet të zbardhet brenda 30 ditësh.