Gjykata Kushtetuese ka vendosur të rrisë pagat për anëtarët e saj, duke shfuqizuar pjesë të Ligjit për Pagat dhe Shpërblimet e Tjera të Personave të Zgjedhur dhe të Emëruar. Nisma për këtë ndryshim ka ardhur nga vetë institucioni, i cili argumenton se siguria materiale është thelbësore për ruajtjen e pavarësisë dhe autonomisë së gjykatësve.
Sipas vendimit, pagat e reja do të hyjnë në fuqi më 1 tetor. Ndryshimi bazohet në kthimin e koeficientëve të mëparshëm për përllogaritjen e të ardhurave, që vlerësohet të sjellë një rritje mujore prej të paktën 200 eurosh për person.
Institucioni ka sqaruar se pagat e gjyqtarëve kushtetues nuk duhet të trajtohen sipas të njëjtave kritere që zbatohen për ministrat apo funksionarët e tjerë publikë, duke vënë theksin te pozicioni i tyre specifik kushtetues.
Ky veprim ka rihapur debatin mbi etikën dhe të drejtën e gjykatësve për të vendosur vetë për të ardhurat e tyre. Vendimi është shoqëruar me kritika në opinionin publik, veçanërisht në një periudhë kur kostoja e jetesës është rritur dhe kur puna e këtij institucioni ka qenë objekt kritikash, përfshirë ato nga institucionet ndërkombëtare si Komisioni Evropian.