Gjykata Kushtetuese shpalli më 11 mars 2026 antikushtetues vendimin e qeverisë për mbylljen e platformës TikTok, duke e cilësuar si kufizim të lirisë së shprehjes dhe shtypit. Vendimi u mor pas shqyrtimit të padisë së Asociacionit të Gazetarëve të Shqipërisë, duke vlerësuar se VKM nr. 151/2025 bie ndesh me Kushtetutën, pasi kufizimet e tilla duhen bërë vetëm me ligj.
Gjykata pranoi se qëllimi për mbrojtjen e fëmijëve dhe të rinjve nga ndikimet negative të platformës përbën interes publik legjitim, por theksoi se masa nuk përmbushi kriterin e proporcionit. Bllokimi i përkohshëm i TikTok-ut u bë pas vrasjes së të miturit Martin Cani nga Martio Përlleshaj, gjithashtu i mitur, pranë Shkollës "Fan Noli" në nëntor 2024. Për ngjarjen, Përlleshaj u dënua me 16 vite burg.
Pas vrasjes, u organizuan protesta të shumta për siguri më të madhe në shkolla dhe dorëheqjen e ministres së Arsimit. Qeveria, pas konsultimesh të gjera me prindër në të gjithë vendin të urdhëruara nga Kryeministri Edi Rama, vendosi mbylljen e platformës. Rihapja ndodhi falë mirëkuptimit me kompaninë, e cila mori masa shtesë për kontrollin dhe sigurinë e përmbajtjeve.
Edi Rama reagoi në rrjetin social X: "Gjykata Kushtetuese mendoka që 90% e prindërve dhe mësuesve shqiptarë ishin gabim kur kërkuan mbylljen e TIKTOK-ut! Fatmirësisht ne e rihapëm TIKTOK-un falë mirëkuptimit që gjetëm tek kompania për masat extra që u morën prej saj, pikërisht falë mbylljes [...] Falë asaj mbylljeje sot prindërit dhe mësuesit mund të jenë pakëz më të lehtësuar, ndërsa falë këtij vendimi [...] shpifësit mund të ndjehen të inkurajuar!".
Përditësime
Kryeministri Edi Rama postoi në X reagimin e tij të plotë: «...se të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot!». Tweet-i u postua në llogarinë @ediramaal më 11 mars 2026 (Burim 2).