Gjykata Kushtetuese e Kosovës ka shpallur antikushtetues reduktimin e shtesës për përvojën e punës në sektorin publik, të parashikuar në Ligjin për Pagat në Sektorin Publik të vitit 2022. Ky ligj e ndryshoi shtesën nga 0.5 për qind në 0.25 për qind për çdo vit të 15 vjetëve të parë të punës, ndërsa pas këtij periudhe mbeti në nivelin e mëparshëm.
Shtesa për përvojën e punës është përqindje shtesë mbi pagën bazë për çdo vit pune në sektorin publik. Që nga viti 2010, ajo përcaktohej në 0.5 për qind, duke synuar shpërblimin financiar të përvojës dhe motivimin e punonjësve për të qëndruar në shërbimin publik. Për shembull, një punonjës me 10 vjet përvojë përfitonte 5 për qind shtesë, ndërsa me 20 vjet, 10 për qind.
Vendimi i Gjykatës Kushtetuese vlerëson se ky ndryshim cenon të drejtat e fituara të punonjësve. Mësimdhënësi Qamil Hajdini, me mbi 30 vjet përvojë në Shkollën Fillore “Zenel Hajdini” në Prishtinë, thekson se dëmi nuk është vetëm financiar, por edhe moral. Ai dhe kolegët e tij kanë paraqitur padi në gjykata, por po hasin vonesa për shkak të numrit të madh të lëndëve.
Radio Evropa e Lirë kontaktoi Këshillin Gjyqësor të Kosovës për numrin e lëndëve, por nuk mori përgjigje deri në publikim.