Gjykata Kushtetuese po shqyrton një kërkesë të paraqitur nga Evis Berberi, ish-drejtori i Autoritetit Rrugor Shqiptar, më 25 tetor 2025. Ai kërkon shfuqizimin e vendimit të Gjykatës së Lartë, i cili la në fuqi masën e arrestit me burg të vendosur nga Gjykata e Posaçme në mars 2024.
Kërkesa vë në dyshim ligjshmërinë e provave të sekuestruara, përfshirë komunikimet në telefonat celularë të Berberit. Këto prova kanë shërbyer për ngritjen e procedimeve penale në tre dosje, që përfshijnë dhjetra persona të akuzuar.
Sekuestrimi i telefonit të Berberit ka dhënë të dhëna për Prokurorinë e Posaçme gjatë dy viteve të fundit. Këto të dhëna kanë çuar në procedime penale ndaj të njëjtit Berberi, ish-zv.kryeministres dhe ministres së Infrastrukturës Belinda Balluku, si dhe kryetarit të Bashkisë së Shkodrës Benet Beci.
Evis Berberi akuzohet për korrupsion, shkelje të barazisë në tendera dhe pastrim parash përmes një skeme kompanish që përfitonin fonde publike.
Belinda Balluku akuzohet për shkelje të barazisë në tendera lidhur me projektin e tunelit të Llogarasë, tenderat e Unazës së Madhe të Tiranës dhe koncesionin e rrugës Thumanë-Kashar, bazuar në komunikimet me Berberin.
Benet Beci është dërguar për gjykim për shkelje të barazisë në një tender gjatë periudhës kur drejtonte Korporatën Elektroenergjetike Shqiptare.
Më 5 mars 2026, Gjykata Kushtetuese zhvilloi një seancë plenare mbi bazën e dokumenteve të kërkesës. Gjykata ka qenë në vëmendje publike kohët e fundit për vendimin mbi pezullimin nga detyra të Belinda Ballukus.