Gjykata Kushtetuese ka zbardhur vendimin me të cilin pranon ankimimin e ish-oficerit të Policisë së Shtetit, Dritan Zagani, duke urdhëruar rishqyrtimin e çështjes penale. Avokati mbrojtës, Dorian Matlija, e përshëndeti vendimin si një moment kyç për vënien e drejtësisë, duke argumentuar se proceset e mëparshme dështuan në adresimin e pretendimeve të mbrojtjes dhe në identifikimin e shkeljeve konkrete ligjore.
Sipas Matlijas, gjykatat nuk kishin arritur të vërtetonin ndonjë dëm të shkaktuar apo qëllim kriminal nga veprimet e Zaganit. Përkundrazi, mbrojtja thekson se akuzat ndaj tij lidheshin me operacione policore, mes të cilave një aksion në Levan të Fierit, për të cilin Zagani kishte raportuar tek eprori i tij, Skënder Hita.
Çështja është ngushtësisht e lidhur me kontekstin politik të asaj periudhe, pasi Zagani kishte denoncuar publikisht lidhjet e ish-ministrit të Brendshëm, Saimir Tahiri, me grupin kriminal Habilaj. Mbrojtja argumenton se ish-oficeri u përball me një klimë presioni publik përpara përfundimit të gjykimit, ndërsa denoncimet e tij më vonë u konfirmuan nga proceset gjyqësore ndaj Tahirit dhe grupit Habilaj.
Pas largimit nga Shqipëria, Dritan Zagani fitoi azil politik. Tashmë, çështja kthehet për rishqyrtim në Gjykatën e Lartë, e cila do të duhet të vlerësojë ligjshmërinë e dënimit të dhënë më parë në dritën e provave dhe argumenteve të reja të konstatuara nga Gjykata Kushtetuese.