Gjykata Kushtetuese e Republikës së Kosovës vendosi më 9 mars 2026 një masë të përkohshme, me të cilën ndalon çdo veprim të Presidentes Vjosa Osmani në lidhje me Dekretin nr. 24/2026 të datës 6 mars 2026 për shpërndarjen e Kuvendit, si dhe çdo veprim të Kuvendit të Kosovës.
Masa hyn në fuqi më 9 mars 2026 dhe zgjat deri më 31 mars 2026. Vendimi u mor njëzëri, në mbështetje të nenit 116 (2) të Kushtetutës, nenit 27 të Ligjit për Gjykatën Kushtetuese dhe rregullave 44, 45, 46 (2) dhe 48 (1) (d) të Rregullores së punës së saj. Gjykata e caktoi masën ex officio dhe sipas kërkesës së parashtruesit.
Vendimi argumenton se masa është e nevojshme për të parandaluar "dëmin e pariparueshëm për rendin kushtetues të Republikës së Kosovës dhe funksionimin demokratik të institucioneve kyçe". Kjo pengon shpalljen e datës për zgjedhje të parakohshme parlamentare nga Presidentja.
Kërkesa për shqyrtim u dorëzua nga kryeministri Albin Kurti në emër të Qeverisë së Kosovës. Qeveria konteston kushtetutshmërinë e dekretit për shkelje të neneve 4 (forma e qeverisjes dhe ndarja e pushteteve), 7 (vlerat kushtetuese), 16 (epërsia e Kushtetutës), 82.3 (rregullat për shpërndarjen e Kuvendit), 84.2 (kompetencat e Presidentit) dhe 86.2 (procedurat për zgjedhjen e Presidentit).
Çështja në shqyrtim
Çështja (KO72/26) kaloi te një kolegji shqyrtues me kryetarin Nexhmi Rexhepi, gjyqtarët Safet Hoxha, Bajram Ljatifi, Radomir Laban, Remzije Istrefi-Peci (raportuese), Enver Peci dhe Jeton Bytyqi. Gjyqtari Radomir Laban kërkoi përjashtimin e tij, por Gjykata e refuzoi njëzëri.
Dekreti u nxorr pasi nuk u zgjodh presidenti i ri deri në fund të ditës së enjte, më 5 mars 2026, pas një seance të jashtëzakonshme të Kuvendit të thirrur nga 42 deputetë të Lëvizjes Vetëvendosje.
Kryeparlamentarja Albulena Haxhiu e cilësoi dekretin jokushtetues dhe premtoi ta kundërshtojë, duke theksuar se Kushtetuta përcakton qartë rrethanat për shpërndarjen e Kuvendit.
Përditësime
Presidentja Osmani mbajti takim konsultativ me partitë politike më 6 mars 2026 për caktimin e datës së zgjedhjeve, sipas kërkesës së Kurtit.
Kërkesa e Qeverisë u dërgua me email më 7 mars 2026 dhe u regjistrua në Gjykatë më 9 mars 2026.
Arbërie Nagavci, shefja e grupit parlamentar LVV, e mirëpriti vendimin. Ajo pret anulimin e plotë të dekretit dhe vazhdimin e procesit të zgjedhjes së presidentit brenda 60 ditësh.
Kuvendi mbajti seancë të jashtëzakonshme më 5 mars 2026, ku deputetët propozuan Glauk Konjufcën dhe Fatmire Mullhaxha-Kollçakun si kandidatë për president.
Grupi Parlamentar i LVV dorëzoi kërkesën për shqyrtim në Gjykatën Kushtetuese, të nënshkruar nga 30 deputetë, jo Qeveria siç thuhej më parë.
- Arbërie Nagavci ka njoftuar kërkesën përmes një postimi në rrjetet sociale.
- Presidenca deklaroi se Vjosa Osmani pret vendimin përfundimtar dhe se dekreti nuk është nënshkruar ende.
- Osmani i është ankuar Albin Kurtit për "28 dhjetorin për zgjedhje" dhe mos përkrahjen e kandidaturës së saj.
Gjykata Kushtetuese vendosi më 25 mars 2026 për kërkesat e bashkuara KO72/26 dhe KO74/26. Dekreti nr. 24/2026 nuk prodhon asnjë efekt juridik. Kuvendi ka 34 ditë nga hyrja në fuqi e vendimit për të zgjedhur presidentin. Nëse dështon, shpërndahet sipas Kushtetutës dhe zgjedhjet mbahen brenda 45 ditësh.