Gjykata Kushtetuese e Republikës së Shqipërisë ka shpallur sot vendimin lidhur me dy kërkesat e opozitës për ngritjen e komisioneve hetimore parlamentare. Institucioni ka pranuar kërkesën për hetimin e zgjedhjeve parlamentare të datës 11 maj 2025, ndërsa ka rrëzuar kërkesën për hetimin e aferës së njohur si “McGonigal”.
Pas shpalljes së vendimit, kreu i grupit parlamentar të Partisë Demokratike, Gazment Bardhi, ka reaguar ashpër, duke e cilësuar vendimin si dëshmi të presionit politik mbi organin e drejtësisë. Sipas Bardhit, rrëzimi i kërkesës për komisionin “McGonigal” është vendosur me raportin 4 me 4 të votave, duke rezultuar në pamundësinë për të marrë një vendim përfundimtar, një situatë të cilën ai e krahasoi me çështjen “Becchetti”.
Bardhi theksoi se kërkesa e opozitës për çështjen “McGonigal” mbështetej në shtatë dokumente zyrtare, të siguruara nga sistemi i drejtësisë amerikane, arbitrazhi ndërkombëtar dhe drejtësia shqiptare. Ai shprehu gjithashtu rezerva ndaj punës së Prokurorisë së Posaçme Kundër Korrupsionit dhe Krimit të Organizuar (SPAK), duke vënë në dukje se procedimi penal nr. 22 i vitit 2023 është ende në proces hetimi prej 3,5 vitesh.