Gjykata Kushtetuese ka bërë publike arsyetimet e vendimeve të saj në lidhje me dy kërkesa të dërguara nga Partia Demokratike për ngritjen e komisioneve hetimore parlamentare.
Në lidhje me çështjen e ish-agjentit të FBI, Charles McGonigal, Gjykata njoftoi se kërkesa nuk është pranuar. Sipas vendimit, ajo nuk përmbush kriterin kushtetues të "çështjes së veçantë", pasi objekti i propozuar nuk individualizon me qartësi faktet ose grupin e fakteve që do t'i nënshtroheshin hetimit.
Ndërkaq, për sa i përket kërkesës për zgjedhjet e 11 Majit 2025, Gjykata Kushtetuese ka vendosur në favor të ngritjes së komisionit. Trupa gjykuese ka shqyrtuar dhe rrëzuar pretendimet e Kuvendit, duke vlerësuar se:
- Ngritja e komisionit nuk e shndërron Kuvendin në një "superorgan".
- Nuk ekziston mbivendosje me Komisionin e Posaçëm për Reformën Zgjedhore.
Gjykata gjithashtu theksoi se situata është e ngjashme me një rast të trajtuar në vitin 2021, duke konfirmuar kështu legjitimitetin e kërkesës së paraqitur nga përfaqësuesit e opozitës.