Gjykata e Rrethit Gjyqësor Tiranë pranoi kërkesën e prokurorisë dhe caktoi masën e sigurisë “arrest në burg” me afat 60 ditë për shtetasin Elez Hysa. Masa u vendos këtë të premte, 22 maj, në lidhje me grabitjen e argjendarisë në Kamëz që ndodhi më 16 maj.
Hysa u ndalua një ditë më parë, më 21 maj, në Malësinë e Krujës. Gjatë hetimeve policia gjeti pranë banesës së tij veshje të ngjashme me ato të përdorura gjatë ngjarjes, pjesërisht të djegura, si dhe kuti bojërash që përkojnë me ngjyrën e motorit të dyshuar të modifikuar. Kamerat e sigurisë e çuan policinë drejt zonës ku banonte i dyshuari.
22-vjeçari mohoi para gjykatës çdo lidhje me grabitjen dhe pretendoi se ka qenë në banesë. Ai ka precedent penal për kultivim të lëndëve narkotike. Policia ka identifikuar një autor tjetër të dyshuar dhe po punon për lokalizimin dhe arrestimin e tij.
Nuk janë gjetur ende motori i përdorur në grabitje dhe arma e zjarrit. Gjatë ndjekjes së autorëve që largoheshin, disa bizhuteri ranë në rrugë dhe u sekuestruan nga policia.
Përditësime
Autorët hynë të armatosur në argjendari dhe kërcënuan punonjësit ndërsa mbanin skafandra. Grabitja zgjati jo më shumë se një minutë.