Dy persona të maskuar hynë të shtunën në një argjendari në pronësi të shtetasit O. L. në Kamëz dhe morën një sasi bizhuterish ari dhe argjendi. Njëri prej tyre ishte i armatosur. Ngjarja ndodhi rreth orës 13:00, kur punonjësja ndodhej në pjesën e pasme të dyqanit dhe nuk u përball me grabitësit.
Kamerat e sigurisë kanë regjistruar itinerarin e autorëve pas grabitjes. Ata u larguan me motor drejt Zallherrit, ku në një moment rrëshqitën dhe u rrëzuan, por vijuan arratisjen. Pamjet tregojnë se autorët mbetën të maskuar gjatë gjithë kohës.
Policia e Tiranës ka shoqëruar disa persona me precedentë penalë për verifikim. Deri tani janë marrë në pyetje 23 persona, por ende nuk është identifikuar asnjë autor. Hetuesit po analizojnë provat dhe vlerën e dëmit, e cila përllogaritet rreth 7 milionë lekë.
Përditësime
Policia mori në pyetje punonjësen e argjendarisë, e cila deklaroi se nuk u përball me grabitësit sepse ndodhej në pjesën e pasme të dyqanit. Ngjarja ndodhi më 16 maj.