Më 14 tetor, Gjykata Themelore në Prishtinë refuzoi kërkesën e Prokurorisë Themelore në Prishtinë për caktimin e paraburgimit ndaj N.A. Ai dyshohet për keqpërdorim të pozitës apo autoritetit zyrtar, zbulim të fshehtësisë zyrtare dhe marrje ryshfeti.
Në vend të paraburgimit, gjykata caktoi dy masa: ndalimin për t’iu afruar vendeve ose personave të caktuar dhe detyrimin për t’u paraqitur në stacionin policor. Të dyja masat vlejnë për një muaj, nga 13 tetori deri më 13 nëntor 2026.
N.A. është i detyruar të mos i afrohet në largësi prej 200 metrash Komunës së Prishtinës, përfshirë vendin e tij të punës, si dhe Agjencisë Kadastrale të Kosovës. Gjykata bëri të ditur se mosrespektimi i masave mund të sjellë caktimin e paraburgimit.
Sipas njoftimit të gjykatës, gjyqtari i procedurës paraprake mori vendimin pas dëgjimit të palëve dhe shqyrtimit të shkresave të lëndës. Gjykata vlerësoi se masat e caktuara do të mundësojnë zhvillimin e papenguar të procedurës penale.
Policia e Kosovës është ngarkuar të verifikojë zbatimin e masave dhe, në rast mosrespektimi, të njoftojë gjyqtarin e procedurës paraprake. Palët e pakënaqura kanë të drejtë ankese në Gjykatën e Apelit.