Gjykata Themelore në Prizren, përmes Departamentit për të Mitur, ka marrë vendimin për caktimin e masës së paraburgimit ndaj të miturit A.O., i cili akuzohet për veprën penale "Vrasje e rëndë". Ngjarja ka ndodhur në fshatin Kobaj të Prizrenit, ku viktimë ka mbetur një 27-vjeçar, i cili sipas burimeve ishte kushëri i të dyshuarit.
Sipas njoftimit të gjykatës, masa e paraburgimit është cilësuar si e nevojshme për të siguruar mbarëvajtjen e hetimeve dhe praninë e të miturit gjatë fazës përgatitore të procedurës. Gjyqtarja e procedurës paraprake ka vlerësuar se kërkesa e Prokurorisë së Shtetit është ligjore dhe e bazuar në provat e shqyrtuara.
Në lidhje me të njëjtin rast, gjykata ka konfirmuar se po shqyrtohen kërkesat e Prokurorisë për caktimin e masës së paraburgimit edhe për dy persona të tjerë:
• Sh.O., vëllai i të miturit, i cili dyshohet për veprën penale "Vrasje e rëndë" në bashkëkryerje.
• A.O., nëna e të miturve, e cila ndodhet në ndalim 48-orësh dhe akuzohet për "Shtytje në vrasje të rëndë".
Këto kërkesa do të trajtohen nga Departamenti për Krime të Rënda i Gjykatës Themelore në Prizren. Seancat dëgjimore për caktimin e masave të sigurisë ndaj këtyre dy personave pritet të mbahen brenda afateve ligjore.