Gjykata Themelore në Ferizaj, Departamenti për të Mitur, miratoi kërkesën e Prokurorisë Themelore për caktimin e masës së paraburgimit ndaj një të mituri. Ai dyshohet për blerje, posedim, shpërndarje dhe shitje të paautorizuar të narkotikëve, si dhe mbajtje në pronësi, kontroll ose posedim të paautorizuar të armëve.
Sipas njoftimit të Gjykatës, më 23 shkurt 2026, në një banesë në Ferizaj, gjatë kontrollit policor në dhomën e të miturit u gjetën:
- 86.7 gramë marihuanë;
- tre qese najloni me 4.7 gramë kokainë;
- 40.2 gramë hashash në formë çokollate;
- 400 euro para të gatshme;
- një peshore dhe letra për mbështjellje narkotikësh.
Po ashtu u konfiskuan një revole me gaz Kurtulus – Taurus, një karikator me 6 fishekë dhe një thikë, të mbajtura pa leje në kundërshtim me Ligjin për Armët.
Gjyqtari i procedurës paraprake, Shabi Idrizi, vlerësoi se ekziston dyshim i bazuar për këto vepra penale. Masa e paraburgimit është 30 ditë. Palët u njoftuan se ankesa kundër këtij vendimi nuk e shtyn ekzekutimin e tij.