Prokuroria Themelore në Ferizaj ka kërkuar nga Gjykata Themelore caktimin e masës së paraburgimit ndaj të pandehurit F.H., nga Prizren, për dyshimin e kryerjes së veprës penale “Blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge”, sipas nenit 267 paragrafi 2, lidhur me paragrafin 1 të Kodit Penal të Republikës së Kosovës.
Më 3 shkurt 2026, rreth orës 19:14, në rrugën “Brahim Ademi” në Ferizaj, pranë rrethit të FSK-së, hetuesit e Drejtorisë për Hetimin e Trafikimit me Narkotikë (DHTN) në Ferizaj kontrolluan automjetin “Renault Clio” të të dyshuarit. Në kroskotin e pasagjerit u gjet një qese najloni me substancë të dyshuar narkotike të llojit marihuanë, me peshë 206.90 gram.
Pas këtij kontrolli, DHTN-Ferizaj, në bashkëpunim me DHTN-Prizren, kryen bastisje në shtëpinë e babait të të dyshuarit në Prizren. Në dhomën e tij u gjetën dy qese najloni me marihuanë, me peshë 8.15 gram, të cilat u sekuestruan nga policia.
Të dyshuari F.H. ndodhet nën masën e ndalimit 48-orësh që nga data 3 shkurt 2026, sipas vendimit të prokurorit të shtetit, deri në përfundimin e procedurave të mëtejshme.