Gjykata Themelore në Gjilan ka caktuar një muaj paraburgim ndaj Arianit Sllamnikut, i dyshuar për dy vepra penale.
Sipas njoftimit të gjykatës, nga një periudhë e papërcaktuar deri më 20 janar 2026, në rrugën “17 Shkurti” në Gjilan, në lokalin “Consulence”, Sllamniku ka ushtruar veprimtari mjekësore dhe farmaceutike pa kualifikim profesional, pa licencë dhe pa autorizime ligjore.
Ai ka kryer trajtime dhe vizita mjekësore për trajtimin e autizmit, duke përshkruar e rekomanduar terapi të paverifikuara dhe të pakonfirmuara shkencërisht. Këto veprime dyshohen si vepër penale “ushtrimi i kundërligjshëm i veprimtarisë mjekësore ose farmaceutike”, sipas nenit 256 të Kodit Penal të Republikës së Kosovës (KPRK).
Gjithashtu, përmes komunikimit elektronik dhe telefonit, pa autorizim dhe në kundërshtim me ligjin për veprimtarinë farmaceutike si dhe rekomandimet e OBSH-së, ka kryer eksperimente mjekësore duke rekomanduar terapi të paverifikuara, kryesisht për fëmijë me autizëm. Kjo dyshohet si vepër penale “eksperimente të kundërligjshme mjekësore dhe testime të barnave”, sipas nenit 257 të KPRK.
Gjatë zbatimit të urdhrit të kontrollit UGJK nr. 5/2026 nga Njësia për Hetime të Përgjithshme (NJHP) në Gjilan, në lokalin “Consulence” është gjetur një dëshmitar që kishte shkuar për konsultim lidhur me trajtimin e autizmit. Po ashtu, janë sekuestruar medikamente të ndryshme mjekësore.
Veprimet fillestare hetimore i ka ndërmarrë Policia e Kosovës, pas raportimit të portalit lajmi.net.
Përditësime
Gjykata Themelore e Gjilanit miratoi kërkesën e Prokurorisë Themelore të Gjilanit për caktimin e një muaji paraburgim ndaj Arianit Sllamnikut.
Sipas akuzave:
- Pranonte pagesa për shërbimet.
- Përfitonte mijëra euro nga prindërit.
- Deklaronte se "shëron autizmin".
- Përdorte barëra të kafshëve për trajtimin e autizmit.
Arianit Sllamniku ka të drejtë ankese në Gjykatën e Apelit.