Gjyqtarja Suela Xhani është përzgjedhur me short për të shqyrtuar padinë e Mereme Selës kundër Partisë Demokratike, e cila mund të ndikojë në zgjedhjet për kreun e partisë më 23 maj 2026.
Mereme Sela ka paditur PD-në, duke argumentuar se përjashtimi i saj nga gara është bërë me një vendim të paarsyetuar, të pamotivuar dhe pa transparencë procedurale. Sipas padisë, ky vendim shkel të drejtat e saj statutare dhe parimin e barazisë në konkurrim.
Padia konteston gjithashtu kandidimin e Sali Berishës, të cilin organet partiake e kanë lejuar në kundërshtim me statutin. Në veçanti, thuhet se neni "Basha" (neni 46) sanksionon largimin nga drejtimi i partisë të kryetarit që humb zgjedhjet.
Mereme Sela paraqet pesë kërkesa kryesore:
- Shpallja e pavlefshme absolute e vendimit për skualifikimin e saj nga gara për kryetar të PDSH-së;
- Detyrimi i PD-së për ta rikthyer atë në garë;
- Shpallja e pavlefshme absolute e kandidimit të Sali Berisha;
- Konstatimi i shkeljes së rëndë të statutit dhe parimeve të demokracisë së brendshme;
- Vendosja e masës së sigurimit: pezullimi i menjëhershëm i procesit zgjedhor të 23.05.2026 deri në përfundim të gjykimit.