Mereme Sela ka paraqitur padi ndaj Partisë Demokratike në Gjykatën e Shkallës së Parë të Tiranës, pas përjashtimit të saj nga gara për kreun e partisë.
Sipas padisë, përjashtimi është bërë me një vendim të paarsyetuar, të pamotivuar dhe në mungesë transparence procedurale. Sela pretendon se ky vendim ka shkelur të drejtat e saj statutare dhe parimin e barazisë në konkurrim.
Në padi ngrihet pretendimi se organet e PD-së kanë lejuar kandidimin e Sali Berishës, në kundërshtim me nenin 46 të statutit, të quajtur "neni Basha". Ky nen, pika 8, përcakton se, në rast se Partia Demokratike nuk rezulton forcë fituese qeverisëse në zgjedhjet parlamentare, mandati i kryetarit përfundon menjëherë dhe automatikisht, duke ndaluar kandidimin në zgjedhjet pasardhëse. PD nuk rezultoi forcë fituese në zgjedhjet e 2025-s, çka bën kandidimin e Berishës të pavlefshëm.
Ky standard i dyfishtë përbën, sipas padisë, shkelje të parimit të barazisë, sigurisë juridike dhe demokracisë së brendshme partiake.
Mereme Sela paraqet pesë kërkesa kryesore:
- Shpallja e pavlefshme absolute e vendimit për skualifikimin e saj nga gara për kryetar të PD-së;
- Detyrimi i PD-së për ta rikthyer në garë;
- Shpallja e pavlefshme absolute e kandidimit të Sali Berishës;
- Konstatimi i shkeljes së rëndë të statutit dhe parimeve të demokracisë së brendshme;
- Vendosja e masës së sigurimit: pezullimi i menjëhershëm i procesit zgjedhor të datës 23 majit 2026 deri në përfundim të gjykimit.