Ministri i Punëve të Jashtme dhe Diasporës i Kosovës, Glauk Konjufca, ka reaguar ndaj sulmeve dhe kërcënimeve të vazhdueshme të Huthëve ndaj Mbretërisë së Arabisë Saudite. Përmes një postimi në rrjetin social X, kreu i diplomacisë kosovare ka shprehur qëndrimin e tij kundër këtyre veprimeve, duke i cilësuar ato si një përshkallëzim të rrezikshëm.
Në deklaratën e tij, Konjufca ka theksuar se tentativat për goditjen e Riadit dhe qytetit të shenjtë të Mekës janë të papranueshme. Ai ka shkruar: “Sulmet e vazhdueshme të Huthëve ndaj Arabisë Saudite, përfshirë tentativat për sulme ndaj Riadit dhe qytetit të shenjtë të Mekës, shënojnë një përshkallëzim të rrezikshëm, të cilin e dënojmë fuqishëm”.
Në vijim, ministri ka riafirmuar mbështetjen e Kosovës për sovranitetin dhe integritetin territorial të Mbretërisë së Arabisë Saudite. Gjithashtu, ai ka kërkuar ndalimin e sulmeve ndaj civilëve dhe objekteve civile, si dhe ka bërë thirrje për respektimin e lirisë së lundrimit, në përputhje me normat e së drejtës ndërkombëtare.