Glauk Konjufca, zëvendëskryeministër i parë dhe ministër i Punëve të Jashtme dhe Diasporës i Kosovës, zhvilloi një bisedë telefonike me Sheikh Abdullah Bin Zayed Al Nahyan, ministrin e Jashtëm të Emirateve të Bashkuara Arabe. Biseda u fokusua në zhvillimet e fundit në Lindjen e Mesme.
Sipas njoftimit zyrtar për media, Republika e Kosovës dënon fuqishëm sulmet e Iranit ndaj shteteve partnere në rajon, përfshirë Emiratet e Bashkuara Arabe, të cilat cenojnë sigurinë dhe stabilitetin rajonal.
Gjatë bisedës, Konjufca shprehu solidaritetin e plotë të Kosovës me Emiratet e Bashkuara Arabe dhe vlerësoi lart mbështetjen e vazhdueshme që ky shtet i ka dhënë Kosovës ndër vite në procesin e shtetndërtimit dhe zhvillimit.
Ai falënderoi homologun për urimet me rastin e marrjes së detyrës, si dhe për ftesën për një vizitë zyrtare në Emiratet e Bashkuara Arabe. Konjufca shprehu gatishmërinë për thellimin e mëtejshëm të marrëdhënieve ndërmjet dy vendeve.