Glauk Konjufca, zëvendëskryeministër i parë dhe ministër i Punëve të Jashtme dhe Diasporës i Republikës së Kosovës, zhvilloi një bisedë telefonike me Stephen Doughty, ministrin e Shtetit për Evropë dhe Amerikën e Veriut të Mbretërisë së Bashkuar dhe Irlandës Veriore.
Gjatë bisedës njoftuese, Doughty riafirmoi mbështetjen e Mbretërisë së Bashkuar për Kosovën dhe aspiratat e saj ndërkombëtare. Ai e uroi Konjufcën për detyrën e re.
Konjufca falënderoi Doughty-n për përkrahjen e vazhdueshme të Mbretërisë së Bashkuar në proceset e shtetndërtimit të Kosovës, si dhe për rolin e saj në forcimin e institucioneve demokratike dhe stabilitetin në vend.
Palët diskutuan mundësitë për zgjerimin e mëtejshëm të bashkëpunimit ndërmjet dy vendeve dhe vazhdimin e koordinimit të ngushtë në çështje me interes të përbashkët në nivel bilateral dhe ndërkombëtar.
Partneriteti ndërmjet Republikës së Kosovës dhe Mbretërisë së Bashkuar mbetet një shtyllë e rëndësishme e zhvillimit demokratik, sigurisë dhe avancimit ndërkombëtar të vendit.