Glauk Konjufca, zëvendëskryeministri i parë dhe ministri i Punëve të Jashtme dhe Diasporës i Kosovës, priti dje Eric Dietz, shefin e Misionit të Ambasadës së Luksemburgut në Kosovë.
Në takimin njoftues pas formimit të qeverisë së re, Dietz e uroi Konjufcën për mandatin e ri dhe riafirmoi gatishmërinë e Luksemburgut për vazhdimin e bashkëpunimit të ngushtë ndërmjet dy vendeve.
Diskutimet u fokusuan në forcimin e marrëdhënieve bilaterale, koordinimin në kuadër të procesit të integrimit evropian dhe zgjerimin e bashkëpunimit ekonomik.
Sipas njoftimit të Ministrisë së Punëve të Jashtme dhe Diasporës, Republika e Kosovës mbetet e përkushtuar për thellimin e mëtejshëm të partneritetit me Luksemburgun.