Specialistët e Seksionit për Hetimin e Narkotikëve të Policisë së Beratit, në bashkëpunim me Prokurorinë e Beratit, finalizuan operacionin e koduar „Prova” pas një hetimi 6-mujor.
Grupi kriminal, i përbërë nga katër shtetas banues në lagjen „Çlirim”, dyshohet se siguronin dhe shpërndanin në mënyrë të organizuar lëndë narkotike, kryesisht kokainë, në doza të vogla në lagje të ndryshme të qytetit.
Për veprën penale „Prodhimit dhe shitjes së narkotikëve”, kryer në bashkëpunim, u ekzekutuan masa sigurie:
- Arrest në burg për S. S., 46 vjeç; A. A., 30 vjeç; dhe T. B., 38 vjeç;
- Arrest në shtëpi për K. S., 18 vjeç.
Operacioni u zhvillua në bashkëpunim me forcat e posaçme Operacionale dhe „Shqiponja”. Gjatë kontrolleve në banesat e tyre dhe në automjetin e 46-vjeçarit, u gjetën sasi kokainë e ndarë në dhjetëra doza të gatshme për shitje, 7 celularë dhe 1 automjet.
Materialet procedurale iu referuan Prokurorisë së Beratit për veprime të mëtejshme.