Prokuroria Themelore në Prishtinë, në bashkëpunim me Policinë e Kosovës dhe Njësitin e Krimeve Kibernetike, ka zhvilluar një aksion për goditjen e një grupi kriminal të përfshirë në mashtrime kibernetike. Gjatë operacionit janë zbatuar tri urdhërkontrolle, ku janë sekuestruar prova materiale, përfshirë një veturë, telefona, kartela SIM dhe fletëpagesa bankare.
Sipas hetimeve, grupi ka vepruar nga muaji dhjetor 2025, duke dërguar mesazhe SMS te qytetarët ku pretendohej për "aktivitet të dyshimtë" në llogaritë e tyre bankare. Mesazhet përmbanin një vegëz që i drejtonte viktimat në një faqe interneti të rreme, ku u kërkohej të plotësonin të dhënat bankare. Përmes kësaj metode, të dyshuarit u kanë tërhequr para nga llogaritë e të dëmtuarve. Mashtrimet janë realizuar në emër të bankave NLB, TEB dhe Raiffeisen.
Deri më tani, janë identifikuar rreth 150 viktima vetëm në rajonin e Prishtinës, ndërsa dëmi financiar i shkaktuar llogaritet në shumën prej 50,000 euro. Autoritetet bëjnë me dije se hetimet janë në zhvillim e sipër dhe se numri i të dëmtuarve, si dhe vlera e dëmit, pritet të rriten pas raportimit të rasteve nga rajone të tjera të vendit.