Toni Gogu, ministër i Drejtësisë, deklaroi se Tirana do të jetë mikpritëse e sesionit hapës të Kongresit Botëror të Ligjit më 6 dhe 7 maj 2026. Ky event paraprin forum kryesor global, që do të zhvillohet në Shqipëri në vitin 2027. Deklarata u bë gjatë një interviste për Report TV.
Gogu theksoi se organizimi nuk është rastësor, por lidhet me rezultatet e reformës në drejtësi gjatë dekadës së fundit. “Shqipëria nuk është më një vend që kërkon modele, por një vend që ka reformuar sistemin e vet dhe tani kontribuon në dialogun global për sundimin e ligjit”, u shpreh ai.
Në fokus të diskutimeve do të jetë roli i drejtësisë për qytetarin, me sfida kryesore garantimin e proceseve më të shpejta, vendimeve më të drejta dhe mbrojtjes së lirive individuale.
Gogu vlerësoi vendimin e Kolegjeve të Bashkuara të Gjykatës së Lartë për masat e sigurisë. Sipas tij, vendimi përcakton se arresti me burg nuk duhet të jetë rregulli, por përjashtimi. Gjykatat duhet të arsyetojnë në mënyrë të detajuar përdorimin e tij, duke shqyrtuar më parë masat alternative. “Në fund nuk i mbetet të pandehurit për të thënë pse nuk duhet të shkojë në burg, por duhet të jetë prokuroria që duhet të thotë pse masa e arrestit është masa e përshtatshme”, tha Gogu.
Vendimi kërkon shqyrtimin e rrethanave, situatës personale dhe proporcionalitetit, pa u bazuar vetëm në llojin e veprës penale.
Ministri bëri të ditur se po punohet për ndryshime në Kodin e Procedurës Penale, në bashkëpunim me ekspertë ndërkombëtarë. Këto ndryshime synojnë të adresojnë nivelin e lartë të paraburgimeve, që sipas një raporti të Këshillit të BE-së është 5 herë më i lartë se mesatarja europiane. Është ngritur një grup pune me ekspertë të huaj; propozimet pritet të publikohen së shpejti për konsultime publike.
Përditësime
Gogu deklaroi se Ministria e Drejtësisë do të dalë së shpejti me një paketë masash për të parandaluar ngjarje si ajo e Durrësit, ku humbën jetën dy të mitur.
Gogu vlerëson vendimin e Gjykatës së Lartë për kufizimin e arrestit me burg. Ai ka lexuar versionin e shkurtuar, pret arsyetimin e plotë për të identifikuar më shumë standarde dhe theksoi se standardet europiane po integrohen në drejtësinë shqiptare.