Gjatë mbledhjes së Komisionit për Kulturën, Turizmin dhe Diasporën, ministri i Turizmit dhe Kulturës, Blendi Gonxhja, sqaroi vendimin e qeverisë për të mos realizuar një koncert të këngëtares Jennifer Lopez në Tiranë. Ministri bëri të ditur se arsyeja e refuzimit ishte kërkesa e saj për një garanci financiare prej 2 milionë eurosh, e cila do të aktivizohej në rast se në vend do të kishte protesta.
"E kemi refuzuar për momentin, sepse kërkonte 2 milionë euro garanci nëse do të ketë protesta. Nuk ia japim dot këtë garanci, pasi kjo është kosto e destabilizimit të vendit", u shpreh Gonxhja.
Diskutimi në komision u përqendrua gjithashtu te financimi prej 4,3 milionë eurosh i qeverisë për koncertin e reperit Kanye West. Kryetarja e komisionit, deputetja e Partisë Demokratike, Ina Zhupa, kërkoi sqarime mbi arsyetimin e këtij fondi si "urgjencë", duke shprehur dyshime mbi mbështetjen financiare publike për një koncert privat dhe duke e lidhur këtë me situatën e biletës së Jennifer Lopez.
Gonxhja mbrojti veprimet e qeverisë, duke shpjeguar se mbështetja u realizua përmes një akti normativ, pasi eventi rrezikonte moszhvillimin. Ai theksoi se vlerësimet paraprake tregojnë një kthim ekonomik për shtetin prej të paktën 6,5 milionë eurosh.
"Nëse s’do të ishte realizuar koncerti, atëherë do të hynim në pyetjen se si do t’i merrnim lekët mbrapsht. Administrata ka vepruar konform rregullave dhe koncerti u mbështet për shkak të ndikimit në turizëm dhe ekonomi", deklaroi ministri.