Ministri i Turizmit, Kulturës dhe Sportit, Blendi Gonxhja, deklaroi se kontrollet përgjatë vijës bregdetare, me fokus segmentin nga Durrësi në Kavajë, po vijojnë me intensitet. Inspektimet kanë për qëllim verifikimin e zbatimit të kontratave nga stacionet e plazhit dhe respektimin e hapësirave publike.
Sipas Ministrisë së Turizmit, inspektorët e Agjencisë Kombëtare të Bregdetit (AKB) po punojnë për të siguruar që operatorët privatë të operojnë brenda sipërfaqeve të miratuara. Ministri Gonxhja u ka bërë thirrje subjekteve që ushtrojnë aktivitet në bregdet të respektojnë detyrimet ligjore dhe të mos cenojnë hapësirat e dedikuara për qytetarët.
Në deklaratën e tij, Gonxhja theksoi se për çdo shkelje do të zbatohet me rigorozitet legjislacioni në fuqi, duke shpallur "zero tolerancë" ndaj çdo tentative që cenon të drejtat e frekuentuesve të plazheve. Mbrojtja e hapësirave publike mbetet një prioritet për qeverinë, me qëllim zhvillimin e qëndrueshëm të turizmit në vend.