Klubi londinez i Fulhamit ka zyrtarizuar afrimin e sulmuesit spanjoll Gonzalo García, i cili vjen nga radhët e Real Madridit. 22-vjeçari ka nënshkruar një kontratë pesëvjeçare, e cila do të jetë në fuqi deri në verën e vitit 2031, me opsionin për zgjatjen e bashkëpunimit për një sezon shtesë.
Në aspektin financiar, Fulhami do të paguajë një shumë që varion nga 40 deri në 42 milionë euro për 70% të të drejtave të lojtarit, ndërsa Real Madridi mban 30% të të drejtave. Vlera e përgjithshme e operacionit është përllogaritur në rreth 60 milionë euro. Lojtari do të bashkohet me trajnerin Álvaro Arbeloa, me të cilin ka punuar më parë te skuadra madrilene.
Gonzalo García është produkt i akademisë së Real Madridit, ku u bashkua në moshën 10-vjeçare. Pas një periudhe te grupmoshat e Mallorcës, ai u kthye në Madrid në vitin 2019. Shpërthimi i tij ndodhi në sezonin 2023/24, ku regjistroi 35 gola me ekipin U-19 dhe 25 gola me Castillan në 36 paraqitje. Gjatë sezonit të kaluar, ai shënoi tetë gola dhe dha tre asistime në 39 ndeshje për ekipin e parë të Real Madridit. Gjithashtu, ai spikati në Kupën e Botës për Klube, duke u shpallur golashënuesi më i mirë i turneut me katër gola dhe një asistim.
Pas finalizimit të marrëveshjes, Real Madridi publikoi një komunikatë zyrtare ku falënderoi futbollistin për kontributin e dhënë dhe i uroi suksese në eksperiencën e re në Ligën Premier.